Berbalagun RSS Txokoa kudeatu
Berba Lagun
Udarako prest!
Mintzaeguna
Euskal Herri osotik joandako mintzalagunak elkartu ziren lehengo larunbatean (maiatzak 31) Izarran (Urkabustaiz). Goizean hasita, egun osoko egitaraua izan zuten, eta eguraldi nahasia ez zen traba izan ondo pasatu, lagunekin elkartu eta mingainak zein gorputzak astintzeko!
Goizeko 11:00etan heldu ziren lehen mintzalagunak Izarrara. Herriko frontoian zain zituzten joaldunak, txalapartariak, bertsolariak eta dantzariak, harrera egiteko. Gainera, eskualdeko mintzalagun batzuek antzerki labur bat egin zuten, euskaldun izateari buruzko umorezko hausnarketa eginez. Ostean, nola ez, sabelak berotzeko hamaiketakoa izan zen.

Mokadutxoa eginda, bi aukera izan zituzten mintzalagunek: askok mendi ibilaldia egin zuten herriko mendi taldeko kideekin, eta beste batzuek jolas mintzodromoa egin zuten frontoian. Izarra ezagutzeko altxorraren bila jolasa prestatu zieten herriko mintzalagunek!

Geroago, mintzalagun guztiak elkartu eta bertso-poteo-kalejira izan zuten Izarran zehar. Ez zen erraza izan artaldea bazkarira bideratzea!

Bazkalostean, Mintza Egunean ohitura bihurtu den sari banaketa izan zen. Mintzalagun egitasmoetan ahalegin berezia edo aipagarria egiten duten lagun batzuek jasotzen dute saria Mintza Egunean, eta aurtengoan bi lagun taldek jaso dute: Gasteizko gaztelagun talde batek, eta Zuiako mintzalagunek. Merienda edo afaria bat egiteko, Arabako produktuz osatutako saski bana jaso zuten, on egin!

Esperientzia berriak izateko eguna ere bada Mintza Eguna. Horregatik, Zuiako mintzalagun eta herritarrek edalontziekin musika sortzeko ariketa antolatu zuten (adibidea: cup song, Altsasuko ikastola).
Eta eguna borobiltzeko, Parradust taldearekin dantzaldia izan zuten!
Astroen behaketa
MAIATZAREN 8an, ostegunez, eguzki sistemako zenbait planeta
TELESKOPIOZ behatzeko saioa antolatu dugu. Jon Legarreta
fisikari doktore derioztarrak gidatuko du ekitaldia, EHUko irakasle
eta Zientzia Planetarioak ikerketa-taldearen kide dena.

Etxean prismatikoak edukiz gero, ez ahaztu saiora ekartzen. Bestalde, teleskopiorik badaukazue, ekarri falta barik, jakina!.

Eta etxeko lanak jartzen jarraituta: ordenagailu eramangarriak
dauzkazuenok, instalatu Stellarium (http://www.stellarium.org) edo Celestia (http://sourceforge.net/projects/celestia) programak, eta ekarri ordenagailuak, oso lagungarriak izango zaizkigu-eta, behatzen dugun guztia bere testuinguruan kokatzen (adibidez, zergatik ematen du planeta guztiak ia-ia lerro beretik igarotzen direla?).

Gure jakinminak eta indarrak piztuta mantentzeko, txokolatada antolatu dugu saioak dirauen bitartean. Eta eguraldi txarragatik saioa bertan behera utzi beharko bagenu, astelehenean, maiatzak 12, saiatuko ginateke berriz, ordu eta leku berean; beraz, utzi libre egun hori zuen agendetan.

NOIZ: 20:30etatik aurrera.
NON: DERION, Kultur Birikaren atzealdean dagoen aparkalekuan.
Marcus Lupertz
Otsailaren 27an Marcus Lupertzen obra ikustera joan ginen.
Artista!!!
Loiu Martiatu 2014
Entendiduek bai, baina jakin, bapez.
Otsailaren 22an Markinako Axpe sagardotegira joan ginen egun pasa.

Eguna ezin politago irten zitzaigun, izan ere Markinara heldu orduko giro epela nagusitu zen . Herriko plaza zeharkatu genuen, umeak futbolean, algarak, tabernetako terrazak jendez beteta eta eguzkia zeru urdinean gure gain. Kale estu batetik sartu ginen, trapuak balkoietan, aspaldiko ateak atarietan, zurezko katuak ate hauek zeharkatzen, eta konturatu orduko gure lehenengo helburura heldu ginen, Jose Pablo Arriaga artistaren dendara hain zuzen ere.

Zurez landutako hainbat altzari ikusi ahal izan genituen, baina beste artista batekin topo egin genuen, bere anaia Enrike. Gizon txikia, argala, itxura ahulekoa, baina esku landuak eta indartsuak. Astiro Pabloren gorabeherak kontatu zizkigun, honen bidaiak eta lanak. Harrigarria zen luma antzeko gizon hau entzutea, bazirudien berba bakoitzean kriston lana egiten ari zela, eskultura bat lantzen egongo balitz bezala, berba bakoitzean askatasun kolpe bat emanez.

Jarraian, Arretxinaga ermitara abiatu ginen, erlijiotasun paganoa kristautasun arimarekin elkartzen den gunera. Harriei buelta emanda gure arbasoen akelarretara hurbildu ginen, sua baino ez zen falta izan.

Handik Axperenera joan ginen. Txotx! Upeletako sagardoa gure edalontzietara. Bide luzea, buelta pare bat, kolore polit hori begiratu, ahora hurbildu eta barrura. Prozesua nahi beste errepikatu ostean eta belarriak prest, Axperen istorioak entzuteari ekin genion. Mendiak, haitzak eta sagarrondoak gure aurrean, sagardoaren prozesuaren azalpenak entzuten hasi ginen. Axpek hilabeteko irakaskuntza eman zigun: Sagardoaren Eusko Labela lortzeko “aditu” batzuk joan ziren bere ekoizpen prozesua aztertzera, ENTENDIDUEK. Entendiduek bai, baina jakin, bapez. Zer esan nahi zigun honekin? Teoriko asko daudela praktika gutxi daukatenak eta praktikak ematen digula jakintza. Azken hau gaur egungo edozein eremutara eraman dezakegu. Adibidez, euskaldunen artean, nork ematen dio gehiago gure kulturari, entendiduek ala euskaraz berba egiten duenak? Eta maitasunean? Hainbat teoria, hainbat bide daude baina egin barik ez da ikasten, beraz epaitu beharrean eman dezagun gure hoberena!
Labasue
Pasa den igandean, berbalagunok Lezamako “Basalbeiti” baserrian gure ohituretatik buelta bat emateko aukera izan genuen. Hain zuzen ere, labasua zer zen ikasi genuen.
Lehenengo eta behin labera abiatu ginen, zapatak lohituta eta aurreko eguneko euri tantekin bustita, piztutako sua inguratu genuen. Labea itzela eta berria zen, gutxienez metro bateko diametroa bazeukan eta. Heldu ginenerako egurra nahiko erreta zegoen eta, ondorioz, labea bero. Eskertzeko beroa, aurreko egunetako umeltasuna apur bat kentzeko ondo baitzetorren. Beraz, aurreko lana eginda zegoenez, heldu orduko azalpenak entzuten hasi ginen eta horrekin batera prozesua: txingarrak labetik atera, labea garbitu eta berotasunean artoa erre. Baina azken hau egin baino lehen, sorpresatxo bat eduki genuen: lagun batek etxean prestatutako taloak urdaiarekin ekarri zituen eta labean sartu genituen gero jateko.
Txingarrak labetik ateratzeko tresna Lezaman “belakia” izena zeukala jakin genuen (Labayru hiztegian begiratuta “belaikia” “belaukia” edo “berakia” azaltzen dena), eta garbitzekoa, “basinerie”. Azken hau, makil bati lotutako iratze sorta bat da, uretan sartzen dena eta labeko errauts guztia garbitzeko ezin tresna hobea dena.
Amaitzeko baserrira hurbildu ginen taloak egiten ikasteko. Gazteak eta umeak izan ziren interesatuenak; nagusiei, ordea, jan eta jan joan zitzaigun goiza. Eta egia esanda, talo eta txakolin artean batzuek berba egitea ere lortu genuen, oso zeregin erreza ez bazen ere, talo eta txakolinaren kalitatea kontuan hartuta.
otsaileko agenda
Azaroko agenda 2014
Sukaldaritza tailerra
12345678910Hurrengoak >
Honi buruz
Txorierriko Berbalagunen bloga duzu hau. Irakurri eta parte hartu!!

Izena emateko deitu (635.75.35.95) edo idatzi hona: txorierri.berbalaguna@gmail.com-era.

Argazkiak
Bilatu

Gura duzu?
Euskaldunon mundua 200x460
Kaixo
Zerbait idazteko